अमेजनका मालिक संंसारकै पहिलो खर्बपति

१२ भाद्र २०७७, शुक्रबार

विराटनगर । भदौ १२

अमेरिकी कम्पनी अमेजनका संस्थापक तथा सिइओ जेफ बेजोसको सम्पत्ति २ खर्ब डलरभन्दा बढी पुगेको छ । उनले २ खर्ब डलर सम्पत्ति हुने विश्वको पहिलो व्यक्तिको रुपमा इतिहास रच्न सफल भएका छन् ।

फोर्ब्स तथा ब्लुम्बर्ग बिलियनिर इन्डेक्सका अनुसार विश्वका सर्वाधिक धनी व्यक्ति बेजोसको सम्पत्तिमा एकैदिन ४ अर्ब ९० करोड डलरमा वृद्धि भएको थियो। यो सँगै उनको कूल सम्पत्ति २ खर्ब डलर नाघेको हो । फोर्ब्सकै अनुसार अमेजन कम्पनीको शेयर मूल्यमा पनि २ प्रतिशतको वृद्धि भएको थियो जसबाट बेजोसको सम्पत्ति झण्डै ५ अर्बले थपिएको हो ।

अमेजन कम्पनीको सिइओ बेजोसको एरोस्पेस कम्पनी ब्लु ओरिजिन तथा वाशिङ्गटन पोष्ट लगायतमा समेत लगानी रहेको छ । अमेजन कम्पनीमा भएको उनको ११ प्रतिशतको शेयर हिस्साले उनको कूल सम्पत्तिको ९० प्रतिशत ओगटेको छ ।

कोरोना महामारीले गर्दा ई–कमर्श कम्पनी अमेजनको व्यापार तथा आम्दानीमा तीव्र वृद्धि भैरहेको छ । सन् २०२० सुरुदेखि अमेजनको शेयर मूल्यमा ८० प्रतिशत वृद्धि भएको छ । २०२० को जनवरी १ मा १ खर्ब १५ अर्ब डलर मात्र सम्पत्ति भएका बेजोसको सम्पत्ति करीब सात महिनाको अन्तरालमै २ खर्ब डलर नाघेको हो ।

फोर्ब्सका अनुसार बुधबार बेजोसको सम्पत्ति २ खर्ब ४ अर्ब डलर नाघेको छ । त्यस्तै ब्लुम्बर्ग बिलिनेयर इन्डेक्स अनुसार उनको सम्पत्ति २ खर्ब २ अर्ब डलर रहेको छ । कोरोनाको महामारी साम्य नहुने हो भने अमेजनको व्यापारवृद्धिलाई नियाल्दा २०२१को जनवरीसम्म बेजोसको ३ खर्ब डलरभन्दा बढी पुग्ने बताइएको छ।

विश्वका अर्बपतिहरूको पहिलो स्थानमा रहेका बेजोसको सम्पत्तिको तुलनामा दोश्रो स्थानमा रहेका बिल गेट्स निकै पछाडि छन् । गेट्सको सम्पत्ति १ खर्ब १६ अर्ब १० करोड रहेको फोर्ब्सले उल्लेख गरेको छ ।