आफ्नै सालो अपहरण गरेर ससुरालीसित १० लाख मागेपछि

१२ भाद्र २०७७, शुक्रबार
तस्वीर- अन्नपूर्ण पोष्ट

विराटनगर। भदौ १२

नेपालगन्जमा आफ्नै सालो अपहरण गरेर १० लाख रुपैयाँ फिरौती माग्ने एक जनालाई बाँके प्रहरीले पक्राउ गरेको छ। अपहरणको ३ दिनपछि बालकको सकुशल उद्दार गरेको छ।

प्रहरी कार्यालय बाँकेका प्रमुख एसपी ओमबहादुर रानाका अनुसार बाँके जिल्ला खजुरा गाउँपालिका ५ रजनवा गाउँका १३ वर्षका बालक इसहाक जाकिर भन्ने इन्तजार खाँलाई उनका भिनाजु नेपालगन्ज उपमहानगरपालिका -१६ का २७ वर्षका कल्लु भन्ने कलिम खाँले ९ भदौमा अपहरण गरेका थिए।

खजुरा-५ को रजनवा गाउँमा मोहर्रमको रमाइलो हेर्न गएको बेला बालकलाई अपहरण गरी जयसपुरस्थित आफ्नै घरमा बन्धक बनाएर फिरौती मागेको एसपी रानाले प्रष्ट पारेका छन् । ‘भिनाजुले बालकलाई बन्धक बनाएर हिन्दी भाषा प्रयोग गरी पीडितकोे परिवारसँग १० लाख रुपैयाँ फिरौती मागेका थिए। खबर पाएपछि हामीले खजुरा गाउँपालिकाको धनौलीबाट अभियुक्तलाई पक्राउ गर्न सफल भयौं। ११ भदौमा जानकी गाउँपालिका-५ बुढिया गाउँमा पीडित बालकको फुपुको घरमा लगेर छोडेको अवस्थामा फेला पारेर उद्दार गर्‍यौं।’ एसपी रानाले जानकारी दिए।

अभियुक्त खाँबाट प्रहरीले अपहरण गर्न प्रयोग भएको भे ४ प २३४४ नम्बरको सुजुकी कम्पनीको मोटरसाइकल एउटा र फिरौती माग्न प्रयोग भएको मोबाइल एक थान पनि बरामद गरेको जनाएको छ।

बालकका परिवारले १० भदौमा जग्गा किन्नका लागि ४ लाख ८५ हजार रुपैयाँ जम्मा गरेको थाहा पाएपछि पैंसाकै लागि अपहरण गरेको देखिएको छ। एसपी रानाले भने, ‘बालक अपहरणका २४ घण्टापछि मात्र प्रहरीमा खबर आएको थियो । आफ्नो खोजतलास जारी राखेको थाहा पाएपछि अपहरणकारीले उक्त बालकलाई फुपुको घरमा लगेर छोडेको प्रहरीले जनाएको छ।