नेकपा सचिवालय बैठक आज बस्दै, को जाने राष्ट्रियसभामा

गौतम र खतिवडाको दौडधूप, कस्ले पाउला राष्ट्रिय सभा सदस्य ?

१८ भाद्र २०७७, बिहीबार
प्रतीनिधिमुल्क तस्विर

 

राष्ट्रियसभा सदस्य पदमा राष्ट्रपतिबाट मनोनित हुने तीनमध्ये एक रिक्त पदमा कसलाई पठाउने भन्ने विषयमा निर्णय गर्न सत्तारुढ दल नेपाल कम्युनिस्ट पार्टी (नेकपा) लाई अहिले अफ्ठेरो भएको छ ।

आज ३ बजे बस्ने नेकपाको सचिवालय बैठकले कार्यदल प्रतिवेदनबाहेक रिक्त राष्ट्रियसभाको एक सदस्यमा कसलाई पठाउने भन्नेबारे छलफल गर्ने नेकपा सचिवालयले जनाएको छ ।

बुधबार बेलुकामात्रै अध्यक्ष तथा प्रधानमन्त्री केपी शर्मा ओलीसँग अध्यक्ष पुष्पकमल दाहाल ‘प्रचण्ड’ र उपाध्यक्ष बामदेव गौतमले छुट्टाछुट्टै भेटवार्ता गरेका थिए । कार्यदल प्रतिवेदनसँगै गौतमको राष्ट्रियसभा प्रवेशबारे भेटवार्तामा छलफल भए पनि सहमति भने जुट्न सकेन ।

सो पदमा उपाध्यक्ष वामदेव गौतम र विगत ६ महिनादेखि संघीय सांसदविनै मन्त्रीको जिम्मेवारी पाइरहेका डा. युवराज खतिवडा आकांक्षी छन् । खतिवडा भदौ २० भित्र राष्ट्रियसभा सदस्य नबने मन्त्रिरिषदबाटै बिदा हुनेछन् । त्यसैले प्रधानमन्त्री ओली खतिवडालाई सदस्य चयन गर्न लागिपरेका छन् ।

बुधबार प्रधानमन्त्री ओलीले अध्यक्ष प्रचण्ड र उपाध्यक्ष गौतमलाई बालुवाटार बोलाएर खतिवडाको पक्षमा सहयोग गर्न आग्रह गरेका थिए । सो भेटमा ओलीलाई गौतमले फागुन १४ को निर्णय कार्यान्वयन गर्न ओलीलाई सम्झाएका थिए ।

राष्ट्रिय सभामा उपाध्यक्ष गौतमको जाने चाहनामा प्रधानमन्त्री ओलीबाहेक सम्पुर्ण नेकपा पार्टीको साथ छ भने खतिवडाको पक्षमा प्रधानमन्त्री ओलीमात्र छन् ।

नेकपा सचिवालय बैठकले गत फागुनमै रिक्त सो पदमा उपाध्यक्ष गौतमलाई पठाउने निर्णय गरेको भएपनि त्यो निर्णय कार्यान्वयन हुन सकेको थिएन । निर्णय कार्यान्वयन नगरेको भन्दै ओलीसँग नेताहरु असन्तुष्ट रहँदै आएका छन् ।

आज बस्ने बैठकबाट अब राष्ट्रसभामा कसलाई लैजाने हो भन्नेबारेमा छलफल नै मुख्य एजेन्डा रहेको छ ।