एमसीसी बारेमा आफूविरूद्ध चाल चलेको भीम रावलको दाबी

२७ भाद्र २०७७, शनिबार

विराटनगर । भदाै २७

सत्तारुढ दल नेपाल कम्युनिस्ट पार्टी (नेकपा)का स्थायी कमिटी सदस्य भीम रावलले आफूले मिलेनियम च्यालेन्ज कम्प्याक्ट (एमसीसी) पारित गर्नुपर्छ नभनेको र यो चलेको अफवाह दलालहरुले आफूविरुद्ध फैलाएको बताएका छन्।

एमसीसीको सुरुदेखि नै विपक्षमा रहँदै आएका रावल एमसीसी पारित गर्न सहमत भएको चर्चा चलेपछि उनले त्यसको खण्डन गर्दै आफूले कहीँ पनि एमसीसी पारित गर्नुपर्छ भनेर नभनेको प्रस्ट पारेका छन्।

आफूले भन्दै नभनेको कुरा भन्यो भनेर हिँड्नेहरु एमसीसी पारित गराउन लागिपरेका दलालहरु भएको आरोप लगाएका छन्।‘मैले भन्दै नभनेको कुरा गरी एमसीसी पारित गर्नुपर्छ भने भनी कुप्रचार अभियान चलाउनेहरू एमसीसी पारित गराउन लागिपरेका त्यसकै दलालहरू हुन्’, शनिबार सामाजिक सञ्जाल ट्विटरमा नेता रावलले लेखेका छन् ।

‘यस्ताहरू भीम रावलले देशभक्तिपूर्ण अडान छोडेदेखि नेपालको शीर झुकाउन सजिलो हुन्थ्यो कि भन्ने कुत्सित सपना देखिरहेका छन् जो कहिल्यै पूरा हुने छैन’ उनले उल्लेख गरेका छन् ।

शनिबार सम्पन्न नेकपा स्थायी समितिको बैठकले एमसीसी परिमार्जन गरेर पारित गर्ने निर्णय गरेको छ। नेकपाको निर्णयसँगै नेता रावल पनि एमसीसी पारित गर्न सहमत भएको चर्चा चलेको थियो। तर रावलले यो हल्ला अाफुविरुद्ध चलाएको मात्रै बताएका छन् ।