कोरोना जितेकाको गुनासाे- ‘कोरोना त जित्यौं तर समाजमा हार्यौं’

२८ भाद्र २०७७, आईतवार
सांकेतिक तस्वीर

विराटनगर । भदाै २८

कोरोना संक्रमण भएर निको भएका व्यक्तिहरु अहिले पनि समाजमा अपहेलित हुनुपरेको अनुभव सुनाउँछन् । संक्रमित भएका व्यक्तिले धेरै व्यक्तिलाई कोरोना सार्न सक्ने भएको तथा कोरोना ठीक भइसकेकालाई पनि पुनः देखिन सक्ने भएको भन्दै आफूहरू सामाजिक अपहेलनामा परेको कोरोनाबाट निको भइसकेकाहरूले दुःखेसो पोखेका छन्।

कैलालीको घोडाघोडी नगरपालिका–३ का एक कोरोना विजेता भन्छन् ‘हामीलाई कोरोना छैन, हामीले कोरोना जितेका छौँ तर समाजसँग हार्‍यौँ, हाम्रा कारण वरपरका व्यक्तिलाई समेत समुदायमा अप्ठ्यारो भएको छ,’ उनले भने, ‘मेरो छिमेकी सामुदायिक वनको समितिमा हुनुहुन्थ्यो, छलफल गर्दा उहाँलाई सधैँ बोलाउँथे तर अहिले मेरै कारण उहाँलाई बैठकमा बोलाउन छाडिएको छ ।’

त्यस्तै घोडाघोडी नगरपालिका–३ कै अर्का कोरोना विजेताले प्रधानमन्त्री कृषि रोजगार कार्यक्रमअन्तर्गत काम गर्न जाने गरेका छिमेकीलाई आफ्नो घरमा आएको भन्दै काम गर्नबाट वञ्चित गरिएको गुनासो गरे । आफ्नो स्वास्थ्य अवस्था सामान्य भइसक्दा पनि अझै समाजले घृणा गरेको देख्दा उनलाई निकै पीडाबोध हुने गर्दछ । ‘हामी पूर्णरूपमा निको भैसकेका छौँ,’ घोडाघोडी नगरपालिका–८ का कोरोना विजेताले भने, ‘तर अझै पनि हाम्रो घर नजिक कोही आउँदैनन् ।’

कोरोना जितेका घोडाघोडी नगरपालिका–१० का रमेश पाण्डे भन्छन्, ‘हामीलार्ई आफ्नै गाउँ समाजले त साथ दिँदैन भने अरू कोसँग सहयोगको अपेक्षा गर्ने ? एकअर्कालार्ई परेको खण्डमा काँधमा काँध मिलाउने हामी नेपालीको स्वाभिमान कहाँ गयो होला ? मर्दापर्दा एकजुट हुने नेपाली संस्कार कहाँ हरायो ?’ कोरोना महामारीले सामाजिक सद्भाव र मानवतामा अनेक प्रश्न उब्जाएको उनको भनाइ छ ।

‘भारतबाट आएका मान्छे भन्नेबित्तिकै घृणा गर्छन्, झन् आफू त संक्रमित भइसकेकाले समाजले गरेको व्यवहार निकै पीडादायी रहेको छ’, घोडाघोडी नगरपालिका–६ का अर्का कोरोना विजेता भन्छन्, ‘अहिले त निको भइसक्यो तर अझै पनि हामीलाई संक्रमित नै छ भन्ने दृष्टिले हेरिन्छ । सुरुमा आफूमा कुनै लक्षण थिएन, नगरपालिकाबाट संक्रमित भयो भनेर खबर आउँदा पत्यार नै लागेन । संक्रमित भएको सुन्नेबित्तिकै टाढा बसेँ तर अब निको भइसक्दा पनि समाजले अझै स्वीकार्न सकेको छैन’, उनी भन्छन् ।

घोडाघोडी नगरपालिका–११ का अर्का कोरोना विजेताका अनुसार सबै सखाप बनायो, सबैलार्ई रोग सारेर गयो भनेर अनेकौँ लाञ्छनायुक्त प्रहार समाजबाट कोरोना संक्रमित भएर पनि कोरोनालाई जितेकाले खेपिरहनु परेको छ । उनलाई संक्रमित भएको पुष्टि हुनुअघि नै परिवारका सबै सदस्य क्वारेन्टिनमा थिए । संक्रमित भएको पुष्टि हुनासाथ समाजले परिवारका सदस्यलार्ई हेर्ने नजर नै बदलिएको उनी सुनाउँछन् । उनी भन्छन्, ‘हामी सबैमाथि अपराधीको जस्तो व्यवहार गरियो ।’

गाउँ समाजले रोग लिएर आयो, गाउँभरि सारेर गयो भनेर आरोप लगाए पनि कोरोना जितिसक्दा आफूले विशेष सतर्कता अपनाएको र आफूले पूर्ण स्वास्थ्य सतर्कता अपनाएकै कारण परिवार, आफन्त तथा सम्पर्कमा आएका कसैमा पनि संक्रमण सर्न नपाएको उनको भनाइ छ । उनी भन्छन्, ‘हामी पनि रोग सर्न दिनुहुन्न भन्ने कुरामा सचेत छौँ तर त्यो रोगलाई पराजित गरिसक्दा पनि समाजमा स्थापित हुन निकै समस्या भइरहेको छ ।’