आइपिएलमा सट्टेबाजी : ‘अपरेसन’ भारतबाट, मुख्य एजेन्टसहित सात जना काठमाडौंबाट पक्राउ

२६ आश्विन २०७७, सोमबार

बिराटनगर असोज २६

आइपिएलमा सट्टेबाजी : ‘अपरेसन’ भारतबाट, मुख्य एजेन्टसहित सात जना काठमाडौंबाट पक्राउ। युएईमा जारी इन्डियन प्रिमियर लिग (आइपिएल)मा सट्टेबाजी खेलाउने ७ जनालाई प्रहरीले पक्राउ गरेको छ। महानगरीय प्रहरी वृत्त, कालिमाटीले सट्टेबाजी खेलाएको आरोपमा आइतबार ६ जनालाई पक्राउ गरेको हो। त्यसमध्ये तीन जना भारतीय रहेको प्रहरी नायब उपरीक्षक (डिएसपी) अपिलराज बोहराले जानकारी दिए।

सोमबार पनि प्रहरीले एक जनालाई पक्राउ गरेको छ। पक्राउ पर्नेमा भारत घर भइ कमलपोखरीको कोनार्क इन होटलमा बस्दै आएका कुलदीप शरण, सन्जीव शरण र कानपुर घर भई कुलेश्वर बस्दै आएका अजय गौतम छन्।

त्यस्तै सिन्धुपाल्चोक घर बताउने प्रदीप घिमिरे, कुलेश्वरका उत्तम सापकोटा र सोल्टीमोडका अनिलकुमार बंसल छन्। पक्राउ परेकाहरूमाथि सोधपुछ गरी सोमबार नविन जैनलाई पनि पक्राउ गरेको हो।डिएसपी बोहराका अनुसार सट्टेबाजी खेलाउने काम भारतबाट नै हुने गरेको छ।  ‘सट्टेबाजीको अपरेसन भारतबाट हुन्छ। यिनीहरू एजेन्टहरू हुन्,’उनले भने,’यहाँको मुख्य एजेन्ट भने कुलदीप शरण हुन्।’

भारत बसेर सट्टेबाजी खेलाउने ओम सरह भन्ने व्यक्ति रहेको उनले बताए। नेपालमा बसेर सट्टेबाजी खेलाउने मुख्य व्यक्ति कुलदीप शरणले ‘डार्क वेब’को प्रयोग गरेको खुलको छ। उनले अरूलाई पासवोर्ड र युजरनेम दिइ डार्क बेवमा प्रवेश गरी सट्टेबाजी खेलाउने गरेको डिएसपी बोहराले बताए।

त्यस्तै यहाँ लगानी गरी उठेको पैसा सबै भारत पठाउने गरेका थिए। उनीहरूले आइपिएल, बिग ब्यास, क्यारेबियन प्रिमियर लिग, बङ्‍गलादेश प्रिमियर लिग, लगायतमा पनि सट्टबाजी खेलाउने गरेका थिए। उनीहरूबाट मोबाइल, मोटरसाइकल, स्कुटर र एक लाख ८५ हजार १ सय २० रुपैयाँ पनि बरामद भएको छ ।प्रहरीले उनीहरूमाथि थप अनुसन्धान गरिरहेको डिएसपी बोहराले जानकारी दिए