Hamro Biratnagar Media Network
24 Jul 2021९ श्रावण २०७८, शनिबार

केन्द्रीय समिति बैठकमा रामचन्द्रको प्रस्ताव- प्रदेशमा ओली समूहलाई समर्थन गर्न सकिन्न, संस्थागत निर्णय गरौँ

2021-01-26 08-01 | Hamro Biratnagar                  

A+ A A-

नेपाली कांग्रेसका वरिष्ठ नेता रामचन्द्र पौडेलले प्रदेश सरकार फेरबदल हुँदा नेकपाको केपी शर्मा ओली समूहलाई समर्थन नगर्न नहुने बताएका छन् ।

मंगलाबार पार्टी कार्यालय सानेपामा बसेको केन्द्रीय समिति बैठकमा पौडेलले कांग्रेस प्रधानमन्त्री ओलीको असंवैधानिक कदमविरूद्ध आन्दोलनमा रहेकाले प्रदेश सरकार फेरबदल हुँदा ओली समूहलाई समर्थन गर्न नहुने बताएका हुन् । बैठकमा पौडेलले प्रदेशमा नेकपाको ओली समूहलाई समर्थन नगर्ने संस्थागत निर्णय गर्न प्रस्ताव गरेका थिए ।

तर, पौडेलको प्रस्तावप्रति सभापति शेरबहादुर देउवाले कुनै प्रतिक्रिया जनाएनन् ।  ‘केन्द्रमा प्रधानमन्त्री केपी ओलीको निर्णयको विपक्षमा कांग्रेस छ। त्यसैले प्रदेशमा ओली समूहलाई समर्थन गर्न वा मिलेर अघि बढ्न सकिँदैन । त्यसैले ओली समूहलाई समर्थन नगर्ने संस्थागत निर्णय तत्काल गराैं,’ पौडेलले बैठकमा भने ।

सभापति देउवा प्रदेश १ र बागमती प्रदेशमा ओली समूहसँग मिलेर सरकार बनाउनु पर्ने पक्षमा छन् । तर, प्रदेश १ बाट प्रतिनिधित्व गर्ने केन्द्रीय सदस्यसहित वरिष्ठ नेता पौैडेल, कृष्णप्रसाद सिटौला लगायत शीर्ष नेताहरू प्रचण्ड-नेपाल समूहसँग मिलेर अघि बढ्नु पर्नेमा जोड दिँदै आएका छन् ।

नेकपाको प्रचण्ड-नेपाल समूहले प्रदेश १ र बागमती प्रदेशमा सरकारविरूद्ध अविश्वासको प्रस्ताव दर्ता गरेको छ । अविश्वासको प्रस्ताव दर्ता भएसँगै प्रचण्ड-नेपाल र ओली समूहले कांग्रेसको साथ मागिरहेका छन् । तर, कांग्रेसभित्र कोसँग मिल्ने भन्ने विषयमा मतान्तर रहेकाले निर्णय गर्न सकिरहेको छैन ।

बैठकमा वरिष्ठ नेता पौडेलले पार्टीको लोकतान्त्रिक मूल्य मान्यता अनुसार अघि बढेकाले संसद् पुनर्स्थापना भन्दा दोस्रो एजेण्डा कांग्रेसको हुन नहुने बताएको केन्द्रीय सदस्य गुरूराज घिमिरेले जानकारी दिए ।  ‘कांग्रेसका नेताहरु द्विविधामा बस्न जरुरी छैन । हामी संसद् पुनर्स्थापनाकै पक्षमा बोल्नुपर्छ र पार्टीको एकसुत्रीय अडान भनेको संसद पुनर्स्थापना नै हो, ’ उनले भने ।

संसद पुनर्स्थापनाको पक्षमा पार्टीले आन्दोलनका कार्यक्रमलाई सशक्त बनाउनुपर्ने पौडेलले बताएका थिए । संसद् पुनर्स्थापनाका लागि दबाब दिन सशक्त रूपमा आन्दोलनमा उत्रिनु पर्नेमा पौडेलले जोड दिइरहँदा मंगलबारको बैठक भने सभापति देउवाले कुनै प्रतिक्रिया जनाएनन् । पार्टीको महाधिवेशनका विषयमा कुरा उठाउँदा भने देउवाले बेला-बेलामा बीच-बीचमा प्रतिक्रिया जनाएका थिए ।


सम्बन्धित खबर


ताजा समाचार
लोकप्रिय