अमेरिकी राष्ट्रपति भएपछि पुटिनसँग बाइडेनको पहिलो फोन संवाद

१४ माघ २०७७, बुधबार

एजेन्सी, १४ माघ । अमेरिकी राष्ट्रपति भएपछि जो बाइडेनले पहिलो पटक आफ्ना रुसी समकक्षी भ्लादिमिर पुटिनसँग टेलिफोन संवाद गरेका छन् । बीबीसीका अनुसार सो संवादमा बाइडेनले पुटिनलाई चुनावी हस्तक्षेपका विषयमा चेतावनी दिएको ह्वाइट हाउसले जनाएको छ ।

दुई राष्ट्रपतिबीच मंगलबार दिउँसो फोन संवाद भएको थियो । त्यसक्रममा रुसमा जारी विपक्षीको प्रदर्शन, आणविक सम्झौताको सुरुवात गर्ने विषयमा छलफल भएको बताइएको छ । बाइडेनले पदभार सम्हालेपछि भएको पहिलो टेलिफोन संवादमा पुटिनले अमेरिकी राष्ट्रपति निर्वाचित भएकामा बाइडेनलाई बधाइ दिएका थिए ।

बीबीसीका अनुसार दुई राष्ट्रपतिबीच अमेरिकी सफ्टवेयर कम्पनीमा भएको साइबर हमला, अफगानिस्तानमा रहेका अमेरिकी सेनामाथि रुसले मूल्य तोकेको तथा एलेस्की नाभाल्नीमाथि भएको विषहमलाका विषयमा छलफल भएको ह्वाइटहाउसको वक्तव्यमा उल्लेख छ ।

उता क्रेम्लिनले भने दुई देशबीचको सम्बन्ध सामान्यिकरण, दुई देशको स्वार्थको सम्बोधन तथा कामका विषयमा दुई राष्ट्रपतिबीच खुलस्त छलफल भएको जनाएको छ ।