Hamro Biratnagar Media Network
24 Jul 2021९ श्रावण २०७८, शनिबार

आज विराटनगरमा नेकपा प्रचण्डसमुहको शक्ति प्रदर्शन, ६० हजार कार्यकर्ता उतार्ने दावी

2021-01-29 11-01 | Hamro Biratnagar                  

A+ A A-

विराटनगर, १६ माघ । प्रतिनिधिसभा विघटनको विरोधमा नेपाल कम्युनिष्ट पार्टी (नेकपा) प्रचण्ड समुहको १ नं. प्रदेश कमिटिले आज विराटनगरमा बृहत शक्ति प्रदर्शन गर्दैछ । विराटनगरको जनआन्दोलन चोकमा हुने कार्यक्रममा सहभागी हुन अध्यक्ष पुष्पकमल दाहाल ‘प्रचण्ड’ भद्रपुर विमानस्थल हुँदै विराटनगर आउँदै छन् । विराटनगरको मौसमको कारण विहान हवाई उडान नभएकोले उनी भद्रपुर भएर आउन लागेको नेकपाले जनाएको छ ।

सभामा सहभागी हुन नेकपाका अर्का अध्यक्ष माधवकुमार नेपाल र बरिष्ठ नेता झलनाथ खनाल बिहीबार साँझ नै विराटनगर आइसकेका छन् । मध्यान्ह १२ बजेबाट हुने सभा अगाडि विराटनगरको बरगाछी, तीनपैनी, रोडशेष चोक र हाटखोलाबाट जुलुस प्रदर्शन हुने पार्टीका प्रदेश सचिव हिमाल राईले जानकारी दिए । प्रधानमन्त्री केपी शर्मा ओलीले पुस ५ गते प्रतिनिधिसभा विघटन गरेपछि त्यसको विरोधमा प्रचण्ड–नेपाल समुह आन्दोलित छ । आन्दोलनको क्रममा प्रदेश १ को राजधानी विराटनगरमा प्रदेशस्तरीय विरोधसभा हुन लागेको हो ।

प्रदर्शनमा ६० हजार हाराहारीमा कार्यकर्ता सहभागी हुने प्रदेश सचिव राईले दावी गरे । सभाको लागि विराटनगरको जनआन्दोलन चौकमा सडकको पश्चिमतर्फ मञ्च निर्माण गरिएको छ । सहभागीहरु भने चोकबाट उत्तर र दक्षिणतर्फको मुख्य सडक तथा ट्राफिकचौक तर्फको हिमालय रोडमा रहेने जनाइएको छ ।

सभा सुरु भएपछि विराटनगरको यातायात प्रभावित हुनेछ । विरोध प्रदर्शनकै लागि नेकपा कार्यकर्ता विराटनगर आइरहेका छन् । हिँजो साँझ सो समुहले विराटनगरमा मसालजुलुस निकालेको थियो ।


सम्बन्धित खबर


ताजा समाचार
लोकप्रिय