Hamro Biratnagar Media Network
04 Aug 2021२० श्रावण २०७८, बुधबार

हुलास वायर श्रमिक प्रकरणः श्रम ऐन विपरित निकालिएका ९३ कामदारलाई १५ हजार दिएर विदा गर्ने उद्योगको प्रस्ताव, मजदुरहरु थप आन्दोलित

2021-07-10 11-07 | Hamro Biratnagar                  

A+ A A-

विराटनगर, २५ असार । मोरङको बुढीगंगा–३ स्थित हुलास वायर इण्डष्ट्रीजका श्रमिकहरु चारदिनदेखि आन्दोलित भएका छन् । सरकारी मापदण्ड अनुसारको सेवा सुविधा माग गर्दै श्रमिकहरुले श्रम कार्यालय मोरङमा उजुरी गरेका थिए ।

त्यसपछि उद्योगले ९३ जना कामदारलाई निष्कासन गरेको थियो । लामो समयदेखि उद्योगमा कार्यरत श्रमिकलाई सरकारी मापदण्ड अनुसारको सेवा सुविधा दिनुपर्नेमा उल्टै श्रमिकलाई निष्कासन गरेपछि उद्योगमा कार्यरत ७ सय बढी मजदुर चारदिनदेखि आन्दोलित भएका हुन् । उनीहरुले उद्योग ठप्प पारेर आन्दोलनमा उत्रिएका हुन् ।

मजदुर संगठन र उद्योगबिच सहमति गर्ने उद्देश्यका साथ वार्ता भएपनि वार्ता टुंगो नलागेपछि श्रमिकहरुले आन्दोलन थालेको हुलास वायर इण्डष्ट्रीजमा कार्यरत मजदुर सुर्य कुमार गिरीले बताए ।

उनका अनुसार शुक्रबार उद्योग प्रशासन र श्रमिकका प्रतिनिधिहरुबिच बार्ता भएको थियो । सो वार्तामा उद्योग प्रशासनले समस्या समाधान गर्नुभन्दा पनि उल्टै दुई महिना वापतको पारिश्रमिक १५ हजार रुपैयाँ मात्र दिन सकिने र निकालिएका कामदारलाई पुनः काममा नराख्ने बताएपछि श्रमिकका प्रतिनिधिहरु आक्रोसित हुँदै वार्तास्थालबाट बाहिरिएका थिए । ‘निकालिएका श्रमिकलाई दुई महिनाको १५ हजार दिन्छौ र फेरी काममा राख्दैनौँ उहाँहरुले भन्नुभयो ।’ उनले हाम्रो विराटनगरसँग भने,‘२२÷२३ वर्षदेखि काम गर्दै आएकालाई कसरी हटाउने? श्रम ऐनले हटाउन दिन्छ ? जिग्दगी त्यहि वितिसकेपछि अहिले निकाल्न मिल्दैन, त्यस्तो कुरा नगर्नुस अब हाम्रो आन्दालन अझ कडा रुपले जारी रहन्छ भनेर हाम्रा प्रतिनिधिहरु निस्कीनुभयो ।’

उद्योगमा कार्यरत मजदुर जंगलाल चौधरीले ६ महिना काम गरेपछि नियुक्ति पत्र र न्युनतम पारिश्रमिक लगायतका सेवा सुविधा पाउनुपर्ने सरकारी नियम भएपनि २२ वर्षदेखि कार्यरत मजदुरलाई पनि सरकारी मापदण्ड बमोजिमको सेवा सुविधा समेत नदिएको बताए । उनका अनुसार सो उद्योगमा ७ सय ५० बढी कामदार कार्यरत छन् ।

उद्योगले कयाँैपटक समय माग गदैै श्रमिकहरुको माग सुनुवाई नगरेका कारण आन्दोलनको विकल्प नभएको उद्योगका कार्यरत श्रमिकहरुले बताएका छन् ।

उद्योगका कार्यरत अर्का श्रमिक गेनुलाल माझीले उद्योगले निष्कासन गरेर रोजगारविहिन बनाएका श्रमिकहरुको साथमा सवै श्रमिकहरु रहेको बताए । उनले निष्कासन गरिएका श्रमिकलाई पुनः रोजगारी प्रदान नगरिएसम्म काम नगर्ने बताए । आन्दोलनरत श्रमिकहरुले तोकिएको मापदण्ड अनुसारको सेवा सुविधा पाउनुपर्ने र रोजगारविहिन बनाइएका मजदुरहरुलाई पुनः रोजगारी प्रदान गर्नुपर्ने माग गरेका छन् ।


सम्बन्धित खबर