Logo

मन्त्रिपरिषद् विस्तार गर्दै प्रदेश १ का मुख्यमन्त्री आचार्य

Logo 2021-08-27 05-08    Hamro Biratnagar

विराटनगर, ११ भदौ । बिहीबार मुख्यमन्त्री पदको शपथ लिइ कार्यभार सम्हालेका प्रदेश १ का मुख्यमन्त्री भीम आचार्य मन्त्रिपरिषद् विस्तार गर्ने तयारीमा जुटेका छन् ।

मुख्यमन्त्री बनेको भोलिपल्ट नै उनले केही मन्त्री नियुक्त गर्न लागेका हुन् । स्रोतका अनुसार आज बेलुकासम्ममा तीन जना मन्त्रीको शपथ गराउने तयारी छ ।

मुख्यमन्त्री कार्यालयले नयाँ मन्त्रीहरूको शपथ गराउने तयारी गर्न भनेको  प्रदेश प्रमुखको कार्यालयले जनाएको छ । मुख्यमन्त्रीका स्वकीय सचिव अनिल राजधामीले तीन जनाको शपथ गराउनेबारे छलफल भइरहेको भन्दै नामको अन्तिम टुंगो नलागेको बताए ।

तर स्रोतले भने माधव नेपाल समूह छाडेका ताप्लेजुङका बलबहादुर साम्सोहाङ, तेह्रथुमका लछुमन तिवारी मन्त्रीमा नियुक्त हुने तयारी भएको बताएको छ । यसअघि शेरधन राई नेतृत्वको सरकारमा सामाजिक विकासमन्त्री रहेकी खोटाङकी उषाकला राई र सोलुखुम्बुका बुद्धिकुमार राजभण्डारी पनि मन्त्रीमा नियुक्त हुने सम्भावना रहेको स्रोतको दाबी छ ।

शेरधन राईले बिहीबार दलको नेता र मुख्यमन्त्रीबाट राजिनामा दिएपछि बहुमत प्राप्त दलको नेताको हैसियतमा एमालेका सचिव रहेका आचार्य मुख्यमन्त्रीमा नियुक्त भएका थिए ।  बिहीबार नै मन्त्रिपरिषद् विस्तार गर्ने भनिए पनि मुख्यमन्त्री आचार्यका भाइको निधनका कारण शुक्रबार गर्न लागिएको हो ।


लोकप्रिय छुटाउनुभयो कि ?