Logo

कांग्रेस–माओवादीमा कार्यकर्ताको खडेरीः मोरङको रतुवामाईमा सिंगो गाउँ एमालेमा प्रवेश

Logo 2021-09-16 12-09    Hamro Biratnagar

विराटनगर, ३० भदौ । मोरङको रतुवामाई नगरपालिकामा नेपाली कांग्रेस–माओवादीमा कार्यकर्ताको खडेरी लागेको छ । रतुवामाई नगरपालिकाको एउटा सिंगो गाउँ नेकपा (एमाले) मा प्रवेश गरेपछि कांग्रेस–माओवादीमा कार्यकर्ताको खडेरी लागेको हो ।

बुधबार रतुवामाई नगरपालिका–४ को सिंघाडी टोलका एक सय ७० घरपरिवारका ३ सय भन्दा बढी एमालेमा प्रवेश गरेका हुन् । नेकपा (एमाले) रतुवामाई नगरपालिका–४ वडा कमिटीले आयोजना गरेको कार्यक्रममा कांग्रेस–मओवादी–जसपा परित्याग गर्दै तीन सय जना भन्दा बढी एमालेमा प्रवेश गरेका हुन् ।

नव प्रवेशीहरुलाई कार्यक्रमका प्रमुख अतिथी नेकपा (एमाले) प्रदेश कमिटी सदस्य तथा जिल्ला समन्वय समिति मोरङका प्रमुख नरेश पोखरेलले टिका लगाइदिएर स्वागत गरे ।

सो अबसरमा बोल्दै नेता पोखरेलले देश र जनताका लागि एमालेले मात्र काम गर्न सक्ने बताए । उनले एमाले नेतृत्वको सरकारले गरेको जनपक्षिय कामले अत्तालिएर देश लुटाहाहरुले गठबन्धन बनाएको आरोप लगाए ।

उनले एमालेको विरोध गर्नेबाहेक देश र जनताका लागि सत्तारुढ गठबन्धनसँग कुनै एजेण्डा नरहेको बताए । उनले परमादेशबाट बनेको शेरबहादुर देउवा नेतृत्वको गठबन्धन सरकार देश लुट्नका लागि मात्र भएको भन्नेकुरा पुष्टि हुँदै गएको समेत आरोप लगाए ।

कार्यक्रममा नवप्रवेशीहरुले देशको विकास एमालेले मात्र गर्न सक्ने भएकाले एमालेमा प्रवेश गरेको बताए । उनीहरुले कांग्रेस–माओवादीले भन्दा एमालेको सरकारले आम जनताले अनुभूति हुनेगरी काम गरेकाले एमाले रोजेको बताए । नवप्रवेशीहरुले उक्त क्षेत्रमा कांग्रेसलाई जिताएर ठुलो गल्ति गरेको समेत बताए ।

कार्यक्रममा रतुवामाई नगरपालिकाकी उपप्रमुख दयन्तादेवी चुडाल, नेकपा (एमाले) रतुवामाई नगर कमिटी अध्यक्ष देवी दाहाल, उपाध्यक्ष कृष्ण ढकाल, सचिव नेवालाल ताजपुरीया, नगर कमिटीका कार्यालय कार्यालय सदस्य शान्तिराम बराल, वडा कमिटी अध्यक्ष हरि महतोलगायतका नेताहरुको उपस्थिती रहेको थियो ।

पार्टी प्रवेश कार्यक्रमको अगुवामाई नेकपा (एमाले) वडा कमिटी सचिव अमनकिशोर सिंहले गरेका थिए ।


लोकप्रिय छुटाउनुभयो कि ?