जनता समाजवादी पार्टी, नेपालले केन्द्रीय समितिको बैठक बोलाएको छ ।
विधान अधिवेशनको तयारीलगायतका विषयमा छलफल गर्न असार ९ बिहान १० बजे बस्ने गरी केन्द्रीय समितिको बैठक बोलाइएको केन्द्रीय प्रचार विभाग प्रमुख पूर्ण बस्नेतले जानकारी दिए ।
पार्टी कार्यालय बालकुमारीमा बस्ने बैठकमा केन्द्रीय कार्यकारिणी समितिले विभिन्न समिति र संगठनहरूले पठाएका सुझाव समेटेर तयार पारेको संशोधित विधानमाथि छलफल हुने बस्नेतले बताए । जसपाले असार १०, ११ र १२ गते काठमाडौंमा विधान अधिवेशन गर्दैछ ।
विभिन्न समिति र सङ्गठनबाट गरी सात सय ७८ जना प्रतिनिधि विधान अधिवेशनमा सहभागी हुँदैछन् । यीमध्ये चार सय २३ जना केन्द्रीय समिति सदस्य रहेका छन् । केन्द्रीय समिति विधान अधिवेशन आयोजक समिति भएकाले जसपाका यी चार सय २३ जना केन्द्रीय सदस्य स्वतः विधान अधिवेशनका प्रतिनिधि हुनेछन् ।
