इलाममा शैक्षिक भ्रमणमा आएका विद्यार्थी र शिक्षक सवार बस दुर्घटनामा ज्यान गुमाउनेको संख्या तीन पुगेको छ ।
धनुषाबाट कन्याम घुम्न आएको ना ६ ख ८४२४ नम्बरको रोङ गाउँपालिका–३ कोल्बुङमा आइतबार दुर्घटनामा परेको थियो । दुर्घटनामा घाइते भएका धनुषाधाम नगरपालिका–९ धारापानीकी ३५ वर्षीया मनवती लामा र ६० वर्षीया शान्तमाया तामाङको उपचारका क्रममा मृत्यु भएको हो ।
घाइते दुवै जनाको झापाको विर्तामोडस्थित बीएन्डसी अस्पतालमा सोमबार बिहान मृत्यु भएको जिल्ला प्रहरी कार्यालय झापाका प्रवक्ता खगेन्द्र रिजालले जानकारी दिए । योसँगै बस दुर्घटनामा ज्यान गुमाउनेको संख्या तीन पुगेको छ ।
यसअघि आइतबार धानुषाधाम नगरपालिका–९, धारापानीकै १२ वर्षीय अर्पण लामाको मृत्यु भएको थियो । बस सडकबाट अन्दाजी तीन सय मिटर तल खसेको थियो । बस दुर्घटनामा चालकसहित ३७ जना घाइते भएका थिए । तीमध्ये तीनको मत्यु भइसकेको छ भने ३३ जनाको हाल बीएन्डसी अस्पतालमै उपचार भइरहेको प्रहरीले जनाएको छ ।
घाइतेमध्ये अन्य दुई जनाको अवस्था पनि चिन्ताजनक रहेको छ । उनीहरूको भेन्टिलेटरमा उपचार भइरहेको छ । बस चालक धनुषा जनकपुर उपमहानगरपालिका–२३ का ४५ वर्षीय हरिकिन राउतलाई इलाका प्रहरी कार्यालय पशुपतिनगरले नियन्त्रणमा लिएको छ ।
