संघीय संसदमा आज बजेट पेस हुँदैछ । बजेटमा नुवाकोटको लागि रणनीतिक अर्थ राख्ने टोखा छहरे सुरुङ मार्ग र पासाङल्हामु राजमार्ग निर्माणका लागि बजेट छुट्याइने अर्थ मन्त्रालयले जनाएको छ ।
पासाङल्हामु राजमार्ग दुई लेनको बनाइ स्तरोन्नति गर्ने योजना अन्तर्गत ठेक्का लागे पनि दशकयता राजमार्गमा सञ्चालनमा आउन सकेको छैन । त्यस्तै, रसुवागढी नाकासम्म पुग्न छोटो दूरीको बाटो पर्ने रणनीतिक महत्वको टोखा छहरे सुरुङ मार्गका लागि पनि बजेट छुट्याइने भएको छ ।
‘वातावरणीय प्रभाव मूल्याङ्कन अध्ययन भइरहेको छ । अर्बौं लाग्ने योजना हो । २८–२९ अर्बभन्दा माथि लागत लाग्ने परियाेजनामा बहुवर्षीय योजना अन्तर्गत बजेट छुट्याइन्छ,’ अर्थमन्त्री डा प्रकाशशरण महतले शिलापत्रसँग भने ।
यसअघि अर्थमन्त्री महत र चिनियाँ राजदूत छन् सोङबीचको भेटमा टोखा छहरे सुरुङ मार्ग छिट्टै निर्माण चरणमा प्रवेश गर्ने विषयमा छलफल भएको थियो ।
